ధర్మస్థలి రహస్యం
(నవీన్ పెద్దాడ, రాజమండ్రి)
ఒక దశాబ్దానికి పైగా అజ్ఞాతంలో గడిపిన ఒక వ్యక్తి, భరించలేని అపరాధ భావంతో కుమిలిపోతూ, అధికారుల ముందుకు వచ్చాడు. ఆ క్షణం, కర్ణాటకలోని పవిత్ర పుణ్యక్షేత్రం ధర్మస్థల దశాబ్దాల నిశ్శబ్దాన్ని ఛేదించుకుని ఉలిక్కిపడింది. అతను ఒకప్పటి పారిశుధ్య కార్మికుడు. 1995 నుంచి 2014 వరకు ఆలయ పరిసరాల్లో పనిచేసిన ఆ దళిత వ్యక్తి చెప్పిన విషయాలు దేశాన్ని నివ్వెరపరిచాయి. “వందలాది మృతదేహాలను పూడ్చిపెట్టాను, వారిలో ఎక్కువ మంది మహిళలు, చిన్నారులే” అని అతను చెప్పినప్పుడు, అది కేవలం ఆరోపణగా మిగిలిపోలేదు. అది పశ్చాత్తాపంతో దహించుకుపోతున్న ఒక మనస్సాక్షి పెట్టిన ఆర్తనాదం.
అతని సాక్ష్యం ఒళ్లు గగుర్పొడిచేలా ఉంది. లైంగిక దాడి ఆనవాళ్లతో, గొంతు నులిమిన గుర్తులతో ఉన్న మృతదేహాలను పూడ్చిపెట్టాలని తనను బలవంతం చేశారని అతను ఆరోపించాడు.
పవిత్ర పుణ్యక్షేత్రం ధర్మస్థలిలో ఇతను చెప్పిన సామూహిక ఖననాల ఆరోపణలపై దర్యాప్తు చేస్తున్న ప్రత్యేక దర్యాప్తు బృందం (SIT) ఇప్పుడు తన వ్యూహాన్ని మార్చింది. కేవలం ఒక సాక్షి మాటలపై ఆధారపడకుండా, శాస్త్రీయ ఆధారాల కోసం అన్వేషణ ముమ్మరం చేసింది. నేత్రావతి నది ఒడ్డున, ఫిర్యాదుదారుడు చూపిన 13వ స్థానం వద్ద తవ్వకాలు సంక్లిష్టంగా మారడంతో, భూగర్భంలో ఏముందో గుర్తించడానికి గ్రౌండ్ పెనెట్రేటింగ్ రాడార్ (GPR) టెక్నాలజీని ఉపయోగించాలని SIT నిర్ణయించింది. ఈ సాంకేతిక పరిజ్ఞానం కోసం ఢిల్లీ, బెంగళూరులోని ఏజెన్సీలను సంప్రదిస్తున్నారు. దర్యాప్తు పరిధిని విస్తరిస్తూ, బాహుబలి కొండల సమీపంలో కొత్త ప్రదేశాలను గుర్తించడంతో, మొత్తం శ్మశాన వాటికల సంఖ్య 17కి పెరిగింది. ఈ పరిణామాలు, దశాబ్దాలుగా అణచివేయబడిన భయానక నిజాలను వెలికితీసే ప్రయత్నంలో తాజా అధ్యాయాన్ని సూచిస్తున్నాయి.
2014లో తన బంధువుల అమ్మాయిపై వేధింపులు జరగడంతో, ప్రాణభయంతో ఊరు విడిచి పారిపోయాడు. తన మాటలకు బలం చేకూర్చేందుకు, అతను స్వయంగా ఒకచోట తవ్వి అస్థిపంజరాన్ని వెలికితీసి, ఫోటోలతో సహా పోలీసులకు సమర్పించాడు.
ప్రజల ఆగ్రహంతో ప్రభుత్వం SITని ఏర్పాటు చేయగా, జూలై 28న తవ్వకాలు ప్రారంభమయ్యాయి. సాక్షి,ఫిర్యాదుదారుడు చూపిన మొదటి ఐదు ప్రదేశాల్లో ఏమీ లభించకపోవడంతో అతని మాటలపై సందేహాలు తలెత్తాయి. కానీ, జూలై 31న ఆరవ స్థానంలో తవ్వకాలు జరుపుతుండగా, పాక్షిక మానవ అస్థిపంజరం బయటపడింది. ఇది దర్యాప్తులో ఒక పెద్ద ముందడుగు. ఆ తర్వాత 11వ స్థానం వద్ద దర్యాప్తును కీలక మలుపు తిప్పిన ఆవిష్కరణ జరిగింది. అక్కడ 100కు పైగా ఎముకలు, ఒక మానవ పుర్రె, వెన్నెముక బయటపడ్డాయి. వాటన్నిటికంటే ముఖ్యంగా, ఆ ప్రదేశంలో ముడివేసిన ఒక ఎర్ర చీర, పురుషుల చెప్పులు లభించాయి. ముడివేసిన చీర లభించడంతో, బాధితురాలిని చీరతో గొంతు నులిమి హత్య చేసి ఉండవచ్చనే అనుమానాలు బలపడ్డాయి. ఈ అవశేషాలన్నింటినీ ఫోరెన్సిక్ విశ్లేషణకు పంపారు. ఫలితాలు రావడానికి రెండు మూడు నెలలు పట్టవచ్చని నిపుణులు చెబుతున్నారు.
ధర్మస్థలంలో ఇలాంటి ఆరోపణలు కొత్త కాదు. 1980ల నుంచే ఇక్కడ అసహజ మరణాలు, వాటిని కప్పిపుచ్చే ప్రయత్నాలపై నిరసనలు ఉన్నాయి. 2012లో 17 ఏళ్ల విద్యార్థిని సౌజన్యపై జరిగిన అత్యాచారం, హత్య కేసులో నిందితుడు 2023లో నిర్దోషిగా విడుదలయ్యాడు. ఆలయ నాయకత్వంతో సంబంధం ఉన్న పలుకుబడి కలిగిన వ్యక్తులను కాపాడేందుకే దర్యాప్తును తప్పుదోవ పట్టించారని సౌజన్య కుటుంబం ఆరోపిస్తూనే ఉంది. 2003లో అదృశ్యమైన వైద్య విద్యార్థిని అనన్య భట్ తల్లి సుజాతా భట్, తన కుమార్తె కూడా ఈ బాధితుల్లో ఉండవచ్చని అనుమానిస్తున్నారు.
ఈ కేసులో అత్యంత ఆందోళనకరమైన అంశం, వ్యవస్థాగత వైఫల్యానికి సంబంధించిన ఆరోపణలు. సమాచార హక్కు చట్టం (RTI) ద్వారా ఒక దిగ్భ్రాంతికరమైన నిజం బయటపడింది. బెళ్తంగడి పోలీస్ స్టేషన్లో 2000 నుంచి 2015 మధ్య నమోదైన అన్ని అస్వాభావిక మరణాల రికార్డులను ధ్వంసం చేశారు. ఈ 15 ఏళ్ల కాలం, ఫిర్యాదుదారుడు ఆరోపణలు చేసిన కాలంతో దాదాపుగా సరిపోలుతుంది. ఈ రికార్డుల ధ్వంసం దర్యాప్తుకు కోలుకోలేని దెబ్బ. ఇది Destroying old records సాధారణ పరిపాలనా ప్రక్రియ అని పోలీసులు చెప్పినప్పటికీ, కీలకమైన డేటాను పూర్తిగా తొలగించడంపై తీవ్ర అనుమానాలు వ్యక్తమవుతున్నాయి. దీనికి తోడు, SIT బృందంలోని ఒక సబ్-ఇన్స్పెక్టరే ప్రధాన సాక్షిని బెదిరించి, ఫిర్యాదును వెనక్కి తీసుకోమని ఒత్తిడి చేశారని అతని తరపు న్యాయవాది ఆరోపించారు.
ఈ కేసు ఒక ఊరిని రెండుగా చీల్చింది. యూట్యూబర్లు, స్థానికుల మధ్య ఘర్షణలు అరెస్టుల వరకు దారితీశాయి. ఇప్పుడు అందరి చూపు ఫోరెన్సిక్ నివేదికలపైనే ఉంది. పాతిపెట్టిన నిజాలను వెలికితీయడానికి జరుగుతున్న ఈ అన్వేషణ, చివరికి శక్తిమంతులను జవాబుదారీగా నిలబెట్టగలదా లేదా అన్నది కాలమే నిర్ణయించాలి.
(వ్యాస రచయిత ప్రముఖ పాత్రికేయుడు)