సరసాల వరస

0

(జంధ్యాల శరత్ బాబు, 99483 45013)
ఒకటీ రెండూ మూడూ కాదు…ఇందులో ఉన్న నవ్వుల గుళికలు నూట పదార్లకు పైనే. అనేకం సచిత్రాలు. రుచి చెప్పిన
ఇంద్రగంటివారన్నట్లు- అన్ని శ్రీరమణీయాలే!
నవ్వు- బతుకు చెట్టు చివర్న పూచే పువ్వు. ఉంటేనే అందం.
ఇందులోని హాస్య రస హృదయులు ఎందరెందరో. విశ్వనాథ, మొక్కపాటి, జరుక్ శాస్త్రివంటివారు. అందుకే మెరుపులూ విరుపులూ చరుపులూ బోలెడన్ని. రెట్టింపు సొగసులు తెచ్చే బాపు బొమ్మలు సరేసరి.
అప్పుడెప్పుడో ఆరుద్ర కితాబిచ్చినట్లు-పేరడీలన్నీ ఈ రచయితకు దంచికొట్టిన పిండి.
నాడు రెండు భాగాలుగా ఉండిన హాస్యజ్యోతి ఆ తర్వాత ఇలా ఒకే సంపుటి అయింది. అప్పటి ఆ ఇద్దరి (ఆరుద్ర,ఇంద్రగంటి హనుమచ్ఛాస్త్రి) మెప్పునే ఇప్పుడిక్కడ ముందు పేజీల్లో జోడించారు.
ఇదంతా అసిధారా… కాదు కాదు…హాస్యధారావ్రతం. సాహితి ప్రచురణతో మరింత సుందరీకృతం.
మెచ్చుతునకల్లో కొన్ని:
ఇచ్చేద్దురూ

  • ముళ్ళపూడి తన ఫ్రెండుకి ఫోన్ చేసి అడిగారు “డబ్బు కావాలి”
    ఎప్పటికి?
    మొన్నటికి!
    *స.. స.. సరదాగా
    టైముకు రావడం శాస్త్రీయం
    రాకపోవడం కృష్ణశాస్త్రీయం- (శ్రీశ్రీ)
    *పైగా ఇదొకటా!
    జ్వరంతో ఉన్న దుగ్గిరాలను చెయ్యిపట్టి పలకరించారు దువ్వూరి సుబ్బమ్మ. “ఎలా ఉంది”
    అసలే బాధపడుతున్నా. ఇలా పాణిగ్రహణం కూడానా (ఛలోక్తిగా)
  • అమ్మో.. ఇంతా
    కొత్తగా మోపెడ్ కొన్న భరాగో ను మిత్రుడడిగాడు “ఎంతైంది?”
    తడిసి మోపెడంత
    *తోస్తే రచయితను నేను
    ఏమీ తోచకపోతే కథలు రాస్తాను
    అవి రాస్తే కానీ తోచదు నాకు – రాచకొండ
    *మహా క్షణం
    *మల్లాది ఒకసారి రమణ ఇంటికొచ్చి రెండు రోజులు ఉండి వెళుతూ అన్నారు “రెండు రోజులూ రెండు క్షణాల్లా గడిచిపోయాయి”
    రమణ: పోనీ మరో క్షణం గడిపి వెళ్ళరాదూ?
    *మచ్చుకో రెండు న్యూ నుడులు
  • అవకాశవాదుల సభకు అందరూ అధ్యక్షులే!
  • ఆర్భాటపు ప్రొడ్యూసరుకు ఆరుగురు డిస్ట్రిబ్యూటర్లు
    మనలో మాట : ఈ పుస్తకాన్ని ఏకబిగిన చదవలేం. ఎందుకంటే- ఇది రమణగారి నవ్వుల గిలిగిలి!
    హాస్య జ్యోతి
    పుటలు: 183; వెల: రూ. 100
    ప్రతులకు : శ్రీరమణ, హైదరాబాదు
    ఫోన్: 76600 12439

LEAVE A REPLY

Please enter your comment!
Please enter your name here